જાહેરાત / BIG BREAKING: CM ભૂપેન્દ્ર પટેલનો પોલીસ ગ્રેડ પે પર સૌથી મોટો નિર્ણય, 550 કરોડનું ભંડોળ કર્યું મંજૂર

• પોલીસ ગ્રેડ પે પર સૌથી મોટો નિર્ણય
• રાજ્યના પોલીસકર્મીઓને મોટી રાહત
• CM ભૂપેન્દ્ર પટેલે રૂ.550 કરોડનું ભંડોળ મંજૂર કર્યુ

ગુજરાત પોલીસના ગ્રેડ પે આંદોલનનો સુખદ અંત આજે આવી ગયો છે. પોલીસ ગ્રેડ પે પર ગુજરાત સરકારે સૌથી મોટો નિર્ણય કર્યો છે.

જાહેરાત કરતાં સીએમ ભૂપેન્દ્ર પટેલે કહ્યું કે સરકાર દ્વારા રૂ.550 કરોડનું ભંડોળ મંજૂર કરવામાં આવ્યું છે. પોલીસકર્મીઓની માંગને લઈ સમિતિની રચના કરી હતી. મારી અને ગૃહમંત્રીની અધ્યક્ષતામાં બેઠકોનું આયોજન થયુ હતુ. બેઠકો અને સમિતિની ભલામણોને ધ્યાને રાખીને નિર્ણય કર્યો છે.

પોલીસકર્મીઓ અને તેમના પરિવારજનોના કલ્યાણની લાગણી સાથે આ બેઠકો તથા સમિતિની ભલામણોનો સ્વીકાર કરીને પોલીસ વિભાગ માટે વાર્ષિક રૂ. ૫૫૦ કરોડનું ભંડોળ મંજૂર કરું છું.

— Bhupendra Patel (@Bhupendrapbjp) August 14, 2022

ગુજરાતના પોલીસ કર્મચારીઓના પગારમાં કરાયો વધારો

• ફિક્સ પગારદાર LRD-ASIનો વાર્ષિક પગાર 96 હજાર 150 વધ્યો
• અગાઉ LRD-ASIનો વાર્ષિક પગાર 2,51,100 હતો
• હવે વધારા બાદ LRD-ASIનો વાર્ષિક પગાર 3,47,250 થયો
• પોલીસ કોન્સ્ટેબલનો વાર્ષિક પગાર રૂપિયા 52 હજાર 740 વધ્યો
• અગાઉ પોલીસ કોન્સ્ટેબલનો પગાર વાર્ષિક 3 લાખ 63 હજાર 660 હતો
• વધારા બાદ પોલીસ કોન્સ્ટેબલનો વાર્ષિક પગાર 4,16,400 થયો
• પોલીસ હેડ કોન્સ્ટેબલના વાર્ષિક પગારમાં 58,740નો વધારો
• અગાઉ પોલીસ હેડ કોન્સ્ટેબલનો વાર્ષિક પગાર 4,36,654 હતો
• હવે વધારા બાદ પોલીસ હેડ કોન્સ્ટેબલનો પગાર 4,95,394 થયો
• ASIના વાર્ષિક પગારમાં 64,740 નો વધારો કરવામાં આવ્યો
• અગાઉ ASIનો વાર્ષિક પગાર 5,19,354 જેટલો હતો
• હવે વધારા બાદ ASIનો વાર્ષિક પગાર 5,84,094 થયો

CM ભૂપેન્દ્ર પટેલની જાહેરાત બાદ ગૃહરાજ્યમંત્રી હર્ષ સંઘવીનું નિવેદન

• - દેશ આખો આઝાદી અમૃત મહોત્સવ ઉજવી રહ્યો છેઃ હર્ષ સંઘવી
• - પોલીસે દેશની અખંડતા જાળવી રાખી છેઃ હર્ષ સંઘવી
• - ગુજરાતને દેશમાં સૌથી સુરક્ષિત બનાવવાનો શ્રેય પોલીસનેઃ હર્ષ સંઘવી
• - પોલીસ કર્મીઓ અને પોલીસ પરિવારની રજૂઆત હતીઃ હર્ષ સંઘવી
• - તમારા સૌ માટે CMએ મહત્વનો નિર્ણય કર્યોઃ હર્ષ સંઘવી
• - ગુજરાત પોલીસ જવાનોના પગારમાં વધારો: હર્ષ સંઘવી
• - 28-10-21ના રોજ બનાવી હતી કમિટી
• - CM ભૂપેન્દ્ર પટેલે 550 કરોડથી વધુની ફાઇલ મંજૂર કરીઃ હર્ષ સંઘવી
• - પોલીસ કોન્સ્ટેબલનો પગાર હવે 4 લાખ 16 હજાર થશે, અગાઉ 3 લાખ 63 હજાર હતો પગાર: હર્ષ સંઘવી
• - હેડ કોન્સ્ટેબલનો વાર્ષિક પગાર 4,96,394 રૂ. કરાયો: ગૃહરાજ્યમંત્રી હર્ષ સંઘવી
• - ASIનો વાર્ષિક પગાર 5,84,094 રૂ. કરાયો: ગૃહરાજ્યમંત્રી હર્ષ સંઘવી
• - તમામ લોકોના પગારમાં ખુબ મોટાપાયે વધારો કરાયોઃ હર્ષ સંઘવી

પોલીસ વિભાગના કર્મચારીઓની વિવિધ રજૂઆત તથા માંગણીઓને ધ્યાને લઇ ત્વરિત ધોરણે સમિતિની રચના કરી હતી. આ અનુસંધાને મારી તથા ગૃહ રાજ્યમંત્રીશ્રીની અધ્યક્ષતામાં અનેક બેઠકોનું આયોજન કરી ચર્ચા-વિચારણા કરવામાં આવી હતી.

— Bhupendra Patel (@Bhupendrapbjp) August 14, 2022

પોલીસ ગ્રેડ પે મુદ્દે કમિટીની રચના બાદ આંદોલન પડ્યું હતું શાંત
સરકારની કમિટી ગઠનની જાહેરાત સાથે જે તે સમયે સરકાર અને પોલીસ વડાના સકારાત્મક વલણથી આંદોલનની આગ શાંત પડી હતી.જે બાદ કમિટીએ જરુંરી ફેરફારનો રિપોર્ટ સરકારને સોંપ્યો હતો જેને પગલે મોંઘવારી ભથ્થા, એલાઉન્સમાં વધારાની માંગ પૂરી થાયતે માટે રૂ.550 કરોડનું ભંડોળને મંજૂરી આપી દેવામાં આવી છે.

પોલીસકર્મીઓની 23 માંગો શું હતી?

• 1. રાજ્યનાં કોન્સટેબલો, હેડ કોન્સટેબલો તેમજ એ.એસ.આઇનાં ગ્રેડ-પે અન્ય રાજ્યોનાં પ્રમાણમાં ખુબ જ ઓછા છે જેના બદલે ૨૮૦૦, ૩૬૦૦ અને ૪૨૦૦ કરવામાં આવે.
• 2. વર્ગ ૩માં ગણતરી થતાં પોલીસ કર્મચારીઓને વર્ગ ૩ મુજબ ગ્રેડ પે અને પે બેન્ડ આપવામાં આવે.
• 3. પોલીસ કર્મચારીઓને સાતમા પગારપંચનો લાભ આપવામાં આવે છે પરંતુ જે રજા પગારનું ચુકવણું કરવામાં આવે છે તે છઠ્ઠા પગારપંચ મુજબ આપવામાં આવે છે, જેમાં સુધારો પણ સરકાર દ્વારા કરવામાં આવે.
• 4. રાજ્ય સરકારના કર્મચારી પોલીસના માણસો હોવા છતાં સરકારના અન્ય કર્મચારીઓને ઉચ્ચતર પગાર ધોરણના ૧૦/૨૦/૩૦ના લાભો સામે પોલીસ કર્મચારીઓને ૧૨/૨૪નું ધોરણ આપવામાં આવે છે. અગાઉ ત્રણ તબક્કામાં પગાર ધોરણ અપાતું હતું પરંતુ હવે માત્ર બે તબક્કામાં પગાર ધોરણ અપાય છે. જે તાત્કાલિક ધોરણે પુર્વવત કરવામાં આવે.
• 5. પોલીસ કર્મચારીઓ માટે ખરીદવામાં આવતા આર્ટીકલ્સની ગુણવત્તા સુધારવા ઉપરાંત હથિયારી અને બિન હથિયારીની એક જ કેડર કરી દેવામાં આવે તેમજ ઓર્ડરલી પ્રથા બંધ કરીને અથવા તેની અલગથી વર્ગ ૪ની ભરતી કરવામાં આવે.
• 6. રાજ્યમાં પોલિસ કર્મચારિઓને ચુકવવામાં આવતા ભથ્થાઓની રકમ જે છેલ્લા ઘણા વર્ષોથી વધારાઇ નથી તે તાત્કાલિક અસરથી વધારવામાં આવે.
• 7. રાજ્યના પોલિસ કર્મચારિઓને અમાનવિય રીતે તેમજ માનવ અધિકારોના હનન મુજબ ૮ કલાકથી વધુ કામ કરાવવામાં આવે છે તેમાં વધારાના કલાકો માટે અતિરિક્ત ચુકવણું કરવામાં આવે તેમજ ચોમાસા, શિયાળા અને ઉનાળા જેવી તમામ ઋતુ દરમ્યાન શારિરિક સુરક્ષાનાં પર્યાપ્ત સાધનો ફાળવવામાં આવે.
• 8. હાલમાં જે રીતે અન્ય સરકારી વિભાગોનાં હિતોની રક્ષા માટે સંગઠનો બનાવવાનો અધિકાર છે તે મુજબ ગુજરાત પોલિસને પણ પોતાનુ યુનિયન / સંગઠનો બનાવવા અધીકાર આપવામાં આવે.
• 9. રાજ્યનાં પોલિસ કર્મચારિઓ જ્યારે બહારનાં રાજ્યોમાં તપાસ અર્થે જતા હોય કે પછી બંદોબસ્ત માટે જતા હોય ત્યારે તેઓને સુવિધાપુર્ણ અતિરિક્ત ભથ્થાઓ અગ્રિમરૂપથી તેમજ તેમના બેંક ખાતાઓમાં સિધ્ધા જ જમા કરી આપવામાં આવે.
• 10. જ્યારે પણ કોઇ પોલિસ કર્મચારીને ફરજ મુક્ત કરવામાં આવે ત્યારે તેઓનો સસ્પેનશન સમયગાળો નિશ્ચિત કરવામાં આવે.
• 11. SRPF પણ ગુજરાત પોલીસ નો એક વિભાગ જ છે માટે SRPF જવાનો ને જીલ્લા મુજબ સ્થાયી કરવામાં આવે.
• 12. નવા પગાર પંચ મુજબ રજા બીલ આપવુ તેમજ તેમાં જાહેર રજા પગાર બંધ ન કરવામાં આવે.
• 13. ૮ કલાક ઉપર નોકરી લેવામાં આવે ત્યારે દર કલાક ૧ કલાક મુજબ રૂ.૧૦૦/- લેખે વધારાનુ ભથ્થુ આપવું, જેમાં દર પાંચ વર્ષે રકમમાં વધારો કરવો.
• 14. પોલીસ કર્મચારીને હજુ પણ દર માસે માત્ર રૂ.ર૦/- નું સાયકલ એલાઉન્સ આપવામાં આવે છે જે રદ કરી નવું ન્યુનતમ એલાઉન્સ દર માસે રૂ.૫૦૦/- આપવું, જેમાં દર પાંચ વર્ષે રકમમાં વધારો કરવો.
• 15. પોલીસ કર્મચારીને દર માસે રૂ.ર૫/- વોશીંગ એલાઉન્સ આપવામાં આવે છે જે રદ કરી નવિન એલાઉન્સ દર માસે રૂ.૧૨૦૦/- આપવું, જેમાં દર પાંચ વર્ષે રકમમાં વધારો કરવો.
• 16. હાલ ગુજરાત પોલીસ કર્મચારીઓને દર માસે રૂ.૪૦૦/- નું ટ્રાવેલ એલાઉન્સ આપવામાં આવે છે જે રદ કરી નવું એલાઉન્સ દર માસે રૂ.૧૫૦૦/- આપવું, જેમાં દર પાંચ વર્ષે આ રકમમાં વધારો કરવો.
• 17. અઠવાડીયા દરમ્યાન કોઇ પણ એક દિવસ નક્કી કરી એક વિકલી ઓફ એટલે કે રજા ફરજીયાત આપવી. જો અઠવાડીયા દરમ્યાન કોઇ અગત્યનો બંદોબસ્ત હોય અને વિકલી ઓફ આપી શકાય તેમ ન હોય તો બીજા સપ્તાહમાં બે વિકલી ઓફ આપવા. જ્યારે લોકડાઉન જેવી સ્થિતિમાં રજા ઉપર પ્રતિબંધ હોય ત્યારે રાજ્યનાં પોલિસ કર્મચારીઓને વિકલી ઓફ દરમ્યાનો એક દિવસ લેખે રૂ.૧૦૦૦/- ભથ્થુ ચુકવવું. જાહેર રજાના દિવસે વિકલી ઓફ આપવામાં આવે તો પણ નિયત કરેલ પગાર મુજબનો રજા પગાર કર્મચારીને આપવો. જેમાં પણ દર પાંચ વર્ષે રકમમાં વધારો કરવો.
• 18. કર્મચારી સતત નોકરી કરતા હોવાના ભારણ પગલે પોલિસ કર્મચારિઓ પોતાના બાળકોને અભ્યાસ પાછળ પુરતો સમય નથી આપી શકતા જેથી બાળક દિઠ ટયુશન ફ્રી આપવી. જેમાં ધોરણ-૧ થી ૫ સુધી અભ્યાસ કરતા બાળકો માટે એક બાળક દિઠ રૂ.૫૦૦/- તથા ધોરણ-૬ થી ૯ સુધી અભ્યાસ કરતા બાળકો માટે એક બાળક દિઠ રૂ.૧૦૦૦/- તથા ધોરણ-૧૦ થી ૧૨ સુધી અભ્યાસ કરતા બાળકો માટે એક બાળક દિઠ રૂ.૧૫૦૦/- દર માસે આપવા. જે ફકત બે બાળક સુધી ટયુશન ફ્રી મળવા પાત્ર રહે તેવી વ્યવસ્થા ગોઠવી શકાય.
• 19. કર્મચારી સતત નોકરી તથા કામનાં ભારણના કારણે પોતના સ્વાસ્થ્યની કાળજી નથી રાખી શકતા જેથી સરકાર તરફથી દરેક કર્મચારીને રૂ.૩૦૦૦૦૦/- લાખ સુધીનો હેલ્થ મેડીકલેઇમ આપવો. જેમાં (કર્મચારી + પત્ની + બે બાળકો) નો સમાવેશ કરવો અથવા કર્મચારી ધ્વારા જાતે રૂ.૩૦૦૦૦૦/- લાખ સુધીનો કોઇ પણ કંપનીનો હેલ્થ મેડીકલેઇમ લેવામાં આવે તો સરકાર તરફથી કર્મચારીને હેલ્થ મેડીકલેઇમના પ્રિમિયમની 50% રકમ સરકાર ધ્વારા ચુકવવાની વ્યવસ્થા ગોઠવી શકાય.
• 20. રાજય લેવલે વેલ્ફર કપાત બંધ કરી જીલ્લા લેવલે વેલ્ફર પોલીસ મંડળ તૈયાર કરી તેનુ સંચાલન જીલ્લા પોલીસ મંડળ ધ્વારા કરવામાં આવે તે રીતે જોગવાઇ કરવી.
• 21. પોલીસ કર્મચારીને વર્ષ દરમ્યાન બે જોડી પોલીસ યુનિફોર્મનુ કાપડ આપવામાં આવે છે જે યોગ્ય નથી પોલીસ કર્મચારીને સતત નોકરીમાં પોલીસ યુનિફોર્મ પહેરવાનો હોવાથી ચાર જોડી યુનિફોર્મનુ કાપડ આપવુ તેમજ તેની સીલાઇનો ખર્ચ એક યુનિફોર્મ મુજબ રૂ.૧ર૦૦/- લેખે ચુકવવા.
• 22. પોલીસ કર્મચારીને વર્ષ દરમ્યાન બે જોડી પી.ટી.સુઝ તથા એક જોડી બ્લેક કલરના કટબુટ આપવામાં આવે છે જે એક દમ હલકી ગુણવત્તાના હોય છે જેથી કર્મચારી પી.ટી.સુઝ/બ્લેક કટબુટ જાતે ખરીદી કરી શકે તેવી જોગવાઇ કરી તેમજ વર્ષ દરમ્યાન બે જોડી પી.ટી.સુઝ ખરીદી માટે રૂ.૨૦૦૦/- તથા એક જોડી બ્લેક કલરનાં કટબુટ ખરીદી માટે રૂ.૨પ૦૦/- દર વર્ષે ચુકવવા.
• 23. પોલીસ કર્મચારીનો ફીકસ પગાર તાલીમ પુરતો જ રાખવો, પોલીસ કર્મચારીની તાલીમ પુર્ણ થયેથી ફુલ પગાર ધોરણ આપવો.